कोशी प्रदेशसभामा पहिलोपटक सङ्कल्प प्रस्ताव प्रस्तुत

विराटनगर, ६ वैशाखः कोशी प्रदेशसभाको आजकोे बैठकमा सङ्कल्प प्रस्ताव पेस गरिएको छ । प्रदेशसभा नियमावली, २०७४ (पहिलो संशोधन) समेतको नियम ७० को उपनियम (१) को खण्ड (ग) बमोजिम नेपाल कम्युनिष्ट पार्टी (एमाले) संसदीय दलका प्रमुख सचेतक रेवतीरमण भण्डारीले सो प्रस्ताव पेस गर्नुभएको हो ।

प्रस्ताव पेस गर्दै उहाँले नेपाल कम्युनिष्ट पार्टी (माओवादी केन्द्र)ले मुख्यमन्त्री केदार कार्कीलाई दिएको विश्वासको मत गत चैत २६ गते फिर्ता लिइसकेका अवस्थामा उहाँ अल्पमतमा पर्नु भएकाले राजीनामा दिइ मार्गप्रशस्त गर्न आग्रह गर्नुभयो । प्रमुख सचेतक भण्डारीले भन्नुभयो, “अल्पमतमा परेपछि शासन गर्ने अधिकार रहँदैन ।”

प्रदेशसभा सदस्यद्वय गणेश उप्रेती र किशोरचन्द्र दुलालले प्रस्तावमा समर्थन जनाउँदै माओवादी केन्द्रको समर्थनबाट मुख्यमन्त्री पदमा निर्वाचित कार्कीले सोही दलले विश्वासको मत फिर्ता लिइसकेपछि राजीनामा दिएर मार्गप्रशस्त गर्न आग्रह गर्नुभयो । प्रदेशसभामा यो पहिलोपटक सङ्कल्प प्रस्ताव प्रस्तुत भएको हो । प्रदेशसभाको अर्को बैठक भोलि बिहान ११ बजे बस्ने सभामुख अम्बरबहादुर विष्टले जानकारी दिनुभयो ।